भारतीय संस्कृति हे त, फेर विदेशी संस्कृति के जरूरत काबर?अपन परंपरा, अपन तिहार अउ अपन संस्कार ल भुलाके दूसर के संस्कृति अपनाय के अंधाधुंध होड़ आखिर कब तक?

तरुण कौशिक, संपादक – सर्वव्यापी

छत्तीसगढ़ के माटी म संस्कृति के जड़ ह बहुत गहिरा हे। हमर पुरखा मन ह अइसन परंपरा, संस्कार अउ जीवन-दर्शन दे गे हें, जेमे परिवार, समाज, प्रकृति, गुरु, माता-पिता, भाई-बहिनी, संतति अउ मानवता के सम्मान के भाव समाय हे। हमर तीज-तिहार, परब अउ धार्मिक आयोजन खाली पूजा-पाठ के माध्यम नइये, बल्कि जिनगी ल सही दिशा दिखाय के माध्यम घलो आय। फेर आज एक सवाल समाज के आगू खड़े हे कि जब हमर अपन संस्कृति म हर रिश्ता, हर जिम्मेदारी अउ हर भावना बर विशेष परब अउ परंपरा मौजूद हे, त फेर विदेशी संस्कृति के नाम म नवा-नवा दिवस मनाय के होड़ काबर बढ़त जात हे?जेन देश के संस्कृति म माता के सम्मान बर मातृनवमी जइसन परंपरा रहिस, ओ देश म मदर्स डे मनाय के जरूरत आखिर काबर महसूस होइस? हमर संस्कृति म माता ल भगवान से घलो ऊंचा स्थान दे गे हे। माता-पिता के सेवा अउ सम्मान ल हमर संस्कार के आधार माने गे हे। फेर आज एक दिन सोशल मीडिया म फोटो लगाके, उपहार देके अउ शुभकामना संदेश भेजके माता के सम्मान जताय के चलन बढ़त जात हे। सवाल ये नइये कि मदर्स डे मनाना गलत हे, सवाल ये हे कि का हमन अपन संस्कृति के मूल भावना ल पूरा साल जी पावत हन?इहीच बात प्रेम अउ अपनापन के मामला म घलो लागू होथे। हमर परंपरा म कौमुदी महोत्सव, वसंत उत्सव अउ प्रेम, सद्भाव अउ पारिवारिक संबंध के अनेक सांस्कृतिक रूप मिलथे। फेर आज वेलेंटाइन डे के नाम म प्रेम के अभिव्यक्ति ल एक दिन तक सीमित करे के चलन बढ़त हे। का प्रेम के मतलब खाली एक-दूसर ल गुलाब देना, उपहार देना अउ सार्वजनिक रूप ले इजहार करना भर आय? हमर संस्कृति म प्रेम के अर्थ समर्पण, विश्वास, त्याग अउ जीवनभर के साथ निभाय म बसे हे।गुरु के सम्मान हमर संस्कृति के सबसे बड़े संस्कार म ले एक आय। गुरु पूर्णिमा के दिन शिष्य अपन गुरु के चरण म माथा टेकथे अउ ज्ञान के प्रति आभार जताथे। फेर आज टीचर्स डे के नाम ले अलग आयोजन करे जाथे। शिक्षक के सम्मान जरूर होना चाही, लेकिन गुरु के असली सम्मान त ओखर बताय रद्दा म चलना, ओखर शिक्षा ल जीवन म उतारना अउ समाज ल ज्ञानवान बनाना आय। खाली एक दिन फूल-माला पहिरा देना गुरु के प्रति कर्तव्य के पूरा होना नइये।स्वास्थ्य के क्षेत्र म धन्वंतरि जयंती हमर प्राचीन चिकित्सा परंपरा अउ आयुर्वेद के गौरव ल बताथे। भगवान धन्वंतरि ल आरोग्य अउ आयुर्वेद के प्रतीक माने गे हे। डॉक्टर मन के सेवा अउ योगदान के सम्मान बर डॉक्टर्स डे मनाय म कोनो आपत्ति नइये, लेकिन अपन प्राचीन चिकित्सा ज्ञान, आयुर्वेद अउ पारंपरिक स्वास्थ्य चेतना ल भुला देना निश्चित रूप ले चिंता के विषय आय। आधुनिक चिकित्सा अउ प्राचीन ज्ञान एक-दूसर के विरोधी नइये, दुनों के अपन-अपन महत्व हे।अइसने विश्वकर्मा जयंती हमर शिल्पकार, कारीगर, निर्माणकर्ता अउ तकनीकी कौशल के सम्मान के परंपरा आय। आज के आधुनिक युग म प्रौद्योगिकी दिवस मनाना घलो जरूरी हे, काबर कि विज्ञान अउ तकनीक के विकास देश के प्रगति के आधार आय। फेर का हमन अपन विश्वकर्मा परंपरा के महत्व ल नई पीढ़ी तक पहुंचाय म सफल होवत हन? जेन हाथ मन औजार बनाथें, मशीन चलाथें, भवन खड़ा करथें अउ देश के विकास म योगदान देथें, ओमन के सम्मान खाली एक दिन के आयोजन तक सीमित नइ रहना चाही।संतान सप्तमी हमर पारिवारिक जीवन अउ संतान के मंगलकामना से जुड़े धार्मिक-सांस्कृतिक परंपरा आय। बाल दिवस के अपन अलग महत्व हे, काबर कि बच्चों के अधिकार, शिक्षा, सुरक्षा अउ उज्ज्वल भविष्य के बात करे जरूरी हे। फेर नवरात्रि म कन्या पूजा अउ कंजिका भोज के माध्यम ले नारी शक्ति अउ बालिका के सम्मान के संदेश देय जाथे। तब सवाल उठथे कि जेन समाज म कन्या ल देवी के रूप म पूजे जाथे, ओ समाज म बेटी के सुरक्षा, शिक्षा अउ सम्मान के जिम्मेदारी ल हमन व्यवहार म काबर नइ निभा पावत हन?रक्षाबंधन अउ भाईदूज हमर भाई-बहिनी के अटूट स्नेह, विश्वास अउ सुरक्षा के प्रतीक आयं। फेर आज सिस्टर्स डे अउ ब्रदर्स डे जइसन दिवस मनाय के चलन घलो बढ़त हे। का हमर रिश्ता मन ल कैलेंडर के तारीख के मोहताज बनाय के जरूरत हे? बहिनी के रक्षा, भाई के स्नेह अउ परिवार के अपनापन त रोज के व्यवहार म दिखना चाही। तिहार के असली उद्देश्य घलो इही आय कि परिवार के रिश्ता मन मजबूत रहंय।पर्यावरण संरक्षण के बात करन त हमर संस्कृति म प्रकृति ल माता के दर्जा दे गे हे। आंवला नवमी, तुलसी विवाह, वट सावित्री, पीपल पूजा अउ नदी, पहाड़, जंगल अउ धरती के प्रति श्रद्धा हमर जीवन-दर्शन के हिस्सा रहिस। हमन पेड़-पौधा, नदी अउ धरती ल केवल संसाधन नइ, बल्कि जीवन के आधार मानथन। फेर आज पर्यावरण दिवस मनाय के जरूरत काबर पड़त हे? एखर जवाब घलो साफ हे कि हमन अपन संस्कृति के प्रकृति-पूजा के संदेश ल व्यवहार म उतारे म कहीं न कहीं पीछे छूट गे हन। आज जरूरत ये हे कि पेड़ लगाय के संग ओखर संरक्षण घलो करन, नदी के पूजा के संग नदी ल गंदगी ले बचाय के जिम्मेदारी घलो निभावन।पत्रकारिता के क्षेत्र म देवर्षि नारद जयंती ल भारतीय परंपरा म संवाद, सूचना अउ संचार के प्रतीक के रूप म देखे जाथे। नारद मुनि के चरित्र संवाद अउ सूचना के आदान-प्रदान के प्रसंग ले जुड़थे। पत्रकारिता के मूल उद्देश्य सत्य, निष्पक्षता अउ जनहित के पक्ष म आवाज उठाना आय। आज पत्रकारिता के सामने चुनौती हे कि खबर के चमक-दमक म सच्चाई कहीं दबे नइ रह जाय। पत्रकारिता के सम्मान खाली दिवस मनाय ले नइ, बल्कि निर्भीकता अउ जिम्मेदारी के संग सच लिखे ले बनथे।अउ पितृपक्ष के बात करन त हमर संस्कृति म अपन पुरखा मन के स्मरण, तर्पण अउ श्राद्ध के परंपरा हे। सात पीढ़ी तक के पूर्वज मन के स्मरण के सांस्कृतिक भाव हमर परिवार अउ वंश परंपरा के जुड़ाव ल बताथे। ये परंपरा हमन ल सिखाथे कि आज हम जेन हन, वो अपन पुरखा मन के संघर्ष, त्याग अउ संस्कार के परिणाम हन। जेन समाज अपन पुरखा मन ल भुला देथे, ओ समाज धीरे-धीरे अपन इतिहास अउ पहचान ले दूर हो जाथे।लेकिन एखर मतलब ये कभू नइये कि विदेशी संस्कृति के हर बात गलत आय। दुनिया के अलग-अलग देश मन के परंपरा, दिवस अउ उत्सव मन के अपन महत्व हे। विज्ञान दिवस, पर्यावरण दिवस, शिक्षक दिवस अउ बाल दिवस जइसन आयोजन के पीछे समाज के हित अउ जागरूकता के उद्देश्य घलो हे। हमन ला कोनो दिवस के विरोध करे के बजाय ओकर उद्देश्य ल समझना चाही। समस्या तब पैदा होथे जब हमन दूसर के संस्कृति ल अपनाय के उत्साह म अपन संस्कृति के महत्व ल ही कम करके देखे लगथन।आज के नई पीढ़ी ल दोष देना घलो उचित नइये। आखिर ओमन अपन संस्कृति के बारे म जानहीं कइसे, जब घर-परिवार म अपन तीज-तिहार के इतिहास, महत्व अउ वैज्ञानिक सोच के चर्चा धीरे-धीरे कम होवत जात हे? स्कूल म भारतीय संस्कृति अउ लोकपरंपरा के जानकारी सीमित रहिथे, सोशल मीडिया म विदेशी उत्सव के चमक-दमक जादा दिखथे। ऐसे म जरूरी हे कि परिवार, समाज, शिक्षा संस्थान अउ सरकार मिलके अपन सांस्कृतिक विरासत ल नई पीढ़ी तक पहुंचावंय।हमर छत्तीसगढ़ के अपन अलग पहचान हे। हरेली, तीजा, पोला, छेरछेरा, कमरछठ, देवारी अउ अनेक लोकपरब हमर माटी के खुशबू अउ लोकजीवन के पहचान आयं। ये तिहार मन म किसान के सम्मान हे, प्रकृति के प्रति आभार हे, परिवार के अपनापन हे अउ समाज के एकता के संदेश हे। जरूरत हे कि हमन अपन लोकसंस्कृति ल खाली आयोजन तक सीमित नइ रखन, बल्कि अपन रोजमर्रा के जीवन म घलो जिंदा रखन।आखिर म सवाल विदेशी दिवस मनाय के नइ, बल्कि अपन संस्कृति के प्रति हमर जिम्मेदारी के आय। मदर्स डे मनावव, लेकिन माता के सेवा अउ सम्मान रोज करव। टीचर्स डे मनावव, लेकिन गुरु के ज्ञान ल जीवन म उतारव। पर्यावरण दिवस मनावव, लेकिन सालभर प्रकृति के रक्षा करव। भाई-बहिनी के दिवस मनावव, लेकिन रिश्ता म प्रेम अउ विश्वास बनाय रखव। संस्कृति के सम्मान दूसर संस्कृति के अपमान करके नइ होवय, बल्कि अपन विरासत ल जाने, समझे अउ अगली पीढ़ी तक पहुंचाय ले होथे।हमर संस्कृति कमजोर नइये, कमजोर होवत हे त ओकर प्रति हमर जागरूकता। हमर परंपरा पुरानी जरूर हे, लेकिन ओकर संदेश आज घलो उतनेच प्रासंगिक हे। सवाल ये नइये कि विदेशी संस्कृति काबर आय, सवाल ये हे कि अपन संस्कृति के अनमोल धरोहर ल हमन अपन अगली पीढ़ी बर कतेक बचा के रख पावत हन?याद रखव, जेन समाज अपन जड़ ल भुला देथे, ओखर पहचान घलो धीरे-धीरे मिटे लगथे। अपन संस्कृति म गर्व करव, दूसर के संस्कृति के सम्मान करव, लेकिन अपन माटी के सुगंध कभू मत बिसरावव।